Ef þú ert með hugmynd, rannsóknarniðurstöður eða verkefni sem gæti skapað verðmæti utan rannsóknarumhverfisins hvetjum við þig til að hafa samband við okkur hjá Auðnu. Við aðstoðum þig við að skoða möguleika á hagnýtingu og hugverkavernd og ráðleggjum um næstu skref. Við hvetjum þig til að hafa samband áður en niðurstöður eru birtar eða kynntar opinberlega, þar sem það getur haft áhrif á möguleika til einkaleyfaverndar.

VILTU TILKYNNA FORMLEGA UM UPPFINNINGU EÐA NÝJUNG?

Ef þú starfar við háskóla eða rannsóknastofnun og vilt tilkynna formlega um uppfinningu eða nýjung sem orðið hefur til í tengslum við rannsóknir þínar getur þú gert það hér. Í tilkynningunni er óskað eftir upplýsingum um uppfinninguna, mögulegt notagildi hennar, hverjir standa að henni og stöðu verkefnisins. Upplýsingarnar eru nýttar til að meta möguleika á hugverkavernd og hagnýtingu.

Tilkynningin berst Auðnu og tengilið viðkomandi háskóla eða rannsóknastofnunar og er meðhöndluð sem trúnaðarmál.

Tilkynning þessi er í samræmi við 5. gr. laga nr. 72/2004 um uppfinningu starfsmanna, sem kveður á um skyldu starfsmanna til að tilkynna vinnuveitanda um uppfinningar tengdar starfi þeirra (og starfsreglur Hugverkanefndar Háskóla Íslands og Landspítala frá 7. febrúar 2013, með síðari breytingum).