AUðNA TÆKNITORG

Niðurstöður rannsókna og uppfinningar byggðar á þeim kunna að skipta sköpum við að betrumbæta samfélagið. Hægt er að auka áhrif rannsókna með því að tryggja hugverkarétt áður en niðurstöður eru birtar opinberlega. Það er hægt að gera hvort tveggja; tryggja hugverkarétt og birta opinberlega. Mikilvægt er að tryggja hugverkarétt áður en rannsókn er birt opinberlega. Uppistöðu að einkaleyfi er hægt að vinna meðfram skrifum á handriti svo þetta er ekki tvöföld vinna og gæti margborgað sig.

Mikilvægt er að tryggja hugverkarétt áður en rannsókn er birt opinberlega.

Byrjaðu á því að hafa samband við tengilið þinnar stofnunar við Auðnu Tæknitorg til að ræða verkefni þitt eða uppfinningu. Tengiliðirnir eru bundnir trúnaðarskyldu varðandi innihald verkefnisins. Verkefni berast svo til Auðnu Tæknitorgs í gegnum tengiliðina. Ástæða fyrir þessu fyrirkomulagi er að vinnuveitendur eiga rétt á uppfinningum starfsmanna sinna og þurfa því að samþykkja að senda verkefnin áfram til Auðnu Tæknitorgs.

Hugverkavernd eða hugverkaréttur getur stóraukið virði og hagnýtingu rannsóknar þinnar eða sprotafyrirtækis. Verndin getur verið forsenda fyrir því að afurð rannsókna komist í gagnið í samfélaginu.

Þegar verkefni hefur borist til Auðnu frá háskóla eða rannsóknarstofnun hjálpar Auðna við að meta og vernda uppfinninguna og heldur utan um hugverkaréttinn í upphafi. Við hjá Auðnu greinum og leggjum mat á ýmsar hliðar uppfinningarinnar; við könnum einkaleyfishæfi, skoðum einkaleyfagagnagrunna og markaðslandslag. Einnig veitum við ráð með næstu skref til að koma niðurstöðum rannsókna og uppfinningum í gagnið.

Hugverkavernd minnkar áhættuna á því að aðrir nýti sér vinnu þína án leyfis

Í hugverkum geta falist mikil verðmæti fyrir vöxt og velgengni fyrirtækja til framtíðar. Hugverk eru því oft talin vera verðmætustu eignir sprotafyrirtækja og þeirra helstu viðskiptatæki. Vaxandi kröfur eru um virka stefnu í hugverkavernd frá hendi ýmissa samkeppnissjóða sem styrkja rannsóknir og þróun. Hugverkaréttur, svo sem einkaleyfi og vörumerki er svæðisbundin réttur og því skynsamlegt að skrá þau á mikilvægum markaðssvæðum.

Ekki láta ræna þig uppfinningunni!

Fyrirtæki og einstaklingar eyða miklum tíma og fjármunum í rannsóknir, þróun og markaðssetningu afurða sinna. Mikilvægt er að hindra að þriðji aðili ræni þá ekki uppfinningunni og afrakstri nýsköpunarinnar. Hugverkavernd er mikilvægur liður í því að minnka þessa áhættu. Stefna í hugverkavernd er því mikilvægur liður í góðri viðskiptaáætlun. Vaxandi kröfur eru um virka stefnu í hugverkavernd frá hendi ýmissa samkeppnissjóða sem styrkja rannsóknir og þróun.

Einkaleyfi, vörumerki og höfundarréttur eru algengustu formin á hugverkarétti, en hönnunarvernd getur einnig verið mikilvæg og skipt miklu máli hvað varðar vörur á markaði. Myndin sýnir ferlið frá umsókn til endaloka hinna ýmsu hugverkaréttinda.

Þegar við hjá Auðnu höfum lokið greiningarvinnu okkar og tekið viðeigandi skref til að tryggja hugverkaverndina er næsta skref að koma verkefninu á framfæri við atvinnulífið og leita réttu fjárfestanna. Það gerum við með því að setja upp kynningastefnu og markaðskynningar sem byggja á greiningum. Næstu skref í framhaldinu tökum við í nánu samráði við uppfinninga og/eða vísindamennina. Þetta kallar á marga fundi og fjölda kynninga á fjölbreyttum vettvangi.

Til að setja þekkingar- og tækniyfirfærslu og rannsóknina eða verkefni þitt í stærra samhengi, tengjum við verkefnin og vinnu okkar við Heimsmarkmið Sameinuðu Þjóðanna. Því vísindin og hugvitið skipta máli.

Í kjölfar markaðsstarfs taka við samningaviðræður við áhugasama fjárfesta, samstarfsaðila úr atvinnulífinu eða frumkvöðla sem vilja grípa boltann og taka verkefnið áfram. Slíkir samstarfs- og nytjaleyfissamningar sem snúa að hugverkarétti geta verið flóknir og framandi. Við sjáum til þess að hagfelldir samningar við réttu aðilana náist þar sem hagsmuna þinna er gætt.